ՏԵՂԵԿԱՏՈՒ ԱՌԱՋՆՈՐԴԱՐԱՆԻ ՔՈՒԷՅԹԻ ԵՒ ՇՐՋԱԿԱՅԻՑ ԵՐԿԻՐՆԵՐՈՒ ՀԱՅՈՑ  ԹԵՄԻՆ

The Armenian's of KUWAIT e-magazine, circulates every FRIDAY. Est. 2009

ՄԵՐ ՄԱՍԻՆ ՀԵՏԵՒԵՑԷ՛Ք ՄԵՐ ԳՈՐԾԱԿԻՑՆԵՐՈՒ ԿԱՅՔԷՋԵՐՈՒՆ ՄԻՋՈՑՈՎ

ՅԱՅՏԱՐԱՐՈՒԹԻՒՆ

ՁԵՐ ԳՈՎԱԶԴԸ ՄԵՐ ԿԱՅՔԷՋԻՆ ՄԷՋ ՏԵՂԱԴՐԵԼՈՒ ՀԱՄԱՐ ԵՒ ՅԱՒԵԼԵԱԼ ՏԵՂԵԿՈՒԹԵԱՆ ՀԱՄԱՐ ԿՐՆԱՔ ԴԻՄԵԼ
[email protected]
cell: 00965-94422576

Պատմական Աննախընթաց Երեկոյ Մը Քուէյթահայութեան Համար

Սրբազան Հայրն ու ՀՀ դեսպանը Շէյխա Ֆարիհային յուշանուէր յանձնաժ պահուն

Հինգշաբթի, 29 մարտ 2012-ին, երեկոյեան ժամը 7:00-ին, առաջին անգամ ըլլալով,
պաշտօնական այցելութեամբ Քուէյթի Սրբոց Վարդանանց եկեղեցին ժամանեց շէյխա Ֆարիհա Ալ
Ահմետ Ալ Ժապեր Ալ Սուպահ:
Շէյխա Ֆարիհան հարազատ քոյրն է Քուէյթի մեծաւոր  Շէյխ Սապահ Ալ Ահմէտ Ալ Ժապեր
Ալ Սուպահին:
Շէյխա Ֆարիհան միջազգային համբաւի արժանացած անձնաւորութիւն է: Ըլլալով Քուէյթի
Ալ Սուպահ ընտանիքի կարեւոր անդամներէն մին` ան բազմաթիւ բարեգործական եւ
մարդասիրական ծրագիրներ հովանաւորած է Քուէյթի մէջ, Եւրոպայի տարածքին եւ այլուր: 
Յատկապէս Քուէյթի մէջ, շէյխա Ֆարիհան մօտիկ յարաբերութիւններ կը պահէ քրիստոնեայ
եկեղեցիներուն հետ, կը պաշտպանէ անոնց իրաւունքները եւ անձնական օժանդակութիւններով
սատար կը հանդիսանայ անոնց աշխատանքներուն: Տարիներ առաջ Շէյխա Ֆարիհան ստացած է
«Օրինակելի մայր» տիտղոսը, որով ծանօթ է աշխարհին:

Սրբոց Վարդանանց եկեղեցւոյ մուտքին տեղի ունեցաւ ժողովրդային պաշտօնական
ընդունելութիւնը` գլխաւորութեամբ Քուէյթի եւ Արաբական ծոցի կաթողիկոսական փոխանորդ
Շահէ եպս. Փանոսեանին, Հայաստանի Հանրապետութեան դեսպան Ֆատէյ Չարչօղլեանին եւ
Ազգային վարչութեան ու ազգային մարմիններու կազմերուն:

Ընդունելութեան պահուն Սրբոց Վարդանանց եկեղեցւոյ բակը հաւաքուած էր խուռներամ
բազմութիւն մը: Ազգային մարմիններու ներկայացուցիչներուն եւ պաշտօնական
անձնաւորութիւններուն կողքին, ներկայ էին` ՀՄԸՄ-ի փողերախումբը, սկաուտական
շարքերը, Ազգային Վարժարանի ուսուցչական կազմն ու աշակերտութիւնը:

Հայկական աւանդութեան համաձայն, եկեղեցւոյ մուտքին հիւրը դիմաւորուեցաւ աղ ու
հացով, ծաղկեփունջով: Ապա, փողերախումբի նուագակցութեամբ, ան առաջնորդուեցաւ դէպի
շրջափակ: Քուէյթի եւ Հայաստանի Հանրապետութեան քայլերգներու ուկնդրութենէն ետք,
համայնքին անունով արաբերէն խօսք արտասանեց Տոքթ. Ժան Պէպէճեան, ապա, ՀՄԸՄ-ի կրտսեր
խումբերը երգեցին Քուէյթի նուիրուած արաբերէն երգեր:

Այնուհետեւ հիւրը առաջնորդուեցաւ եկեղեցի, ուր կատարուեցաւ յատուկ արարողութիւն.
ապա հիւրը առաջնորդուեցաւ «Արագած» սրահ, ուր, մտերմիկ մթնոլորտի մէջ, Ազգային
վարժարանի հոգաբարձութեան ատենապետ Մունիր Դարբինեան պաշտօնապէս հիւրին առաջարկեց
նաեւ առիթով մը այցելութիւն մը շնորհել նաեւ Վարժարանին:

Նոյն օրը երեկոյեան, «Շերաթոն» պանդոկի ճաշասրահներէն մէկուն մէջ, ի պատիւ շէյխա
Ֆարիհային, տեղի ունեցաւ պաշտօնական ընթրիք: Այս առթիւ, պատրաստուած էր
գեղարուեստական կոկիկ յայտագիր մը, որ սկսաւ  Քուէյթի եւ Հայաստանի Հանրապետութեան
օրհներգներով: Հանդիսութեան բացման խօսքը արտասանեց Ազգային վարչութեան ատենապետ
Կոստանդին Մոմճեան: Օրուան հանդիսավարն էր Արշօ Պեքմեզճեան: Ցուցադրուեցաւ
«Քուէյթահայ գաղութի կազմութեան պատմական ակնարկ» խորագիրով խտասալիկ մը, որմէ ետք,
դաշնամուրի նուագակցութեամբ յաջորդաբար ելոյթ ունեցան Փաթիլ Զաքարեան եւ տոքթ.
Ռազմիկ Պէպէճեան:

Կարճ դադարէ ետք ցուցադրուեցաւ շէյխա Ֆարիհայի կեանքն ու ընկերային,
մշակութային, կրօնական եւ բարեսիրական մարզերուն մէջ անոր ունեցած գործունէութիւնը 
խտացնող վաւերագրական տեսերիզ մը, ապա Ճորճ Սալամէ, իր հեղինակած եւ շէյխային
նուիրուած բանաստեղծութիւնը արտասանելով` մեծապէս ոգեւորեց ներկաները:

Յայտագրի աւարտին  բեմ բարձրացան Քուէյթի մէջ
Հայաստանի դեսպան` Ֆատէյ Չարչօղլեան եւ թեմի կաթողիկոսական փոխանորդ Շահէ եպս.
Փանոսեան: Իր խօսքին մէջ սրբազան հայրը  կարեւորութեամբ անդրադարձաւ անցնող շուրջ
60 տարիներու ընթացքին Քուէյթի մէջ ծաւալած ազգային եկեղեցական կեանքին: Ան
շնորհակալութիւն յայտնեց Քուէյթի ղեկավարներուն, որոնք ոչ միայն խաղաղօրէն ապրելու
եւ գործելու կարելիութիւններ կը ստեղծեն մեր ժողովուրդի զաւակներուն համար, այլ
նաեւ առիթ եւ պայմաններ կ՛ընծայեն, որ հայութիւնը ապրի իր ազգային աւանդներով ու
պահէ իր կրօնական ինքնութիւնը: Սրբազան հայրը նաեւ շէյխայէն խնդրեց, որ
կարեւորութեամբ նկատի ունենայ համայնքին կարիքները եւ դիւրացնէ սեփական եկեղեցի մը
ունենալու հնարաւորութիւնները:


Այնուհետեւ բեմ հրաւիրուեցաւ շէյխա Ֆարիհան: Անդրանիկ եւ պատմական այս
այցելութեան առթիւ սրբազան հայրը շէյխային նուիրեց պատմական Հայաստանի տեսարժան
վայրերուն լուսանկարները պարունակող «Երկիր» գեղատեսիլ ալպոմը, իսկ Հայաստանի
դեսպան Չարչօղլեան անոր յանձնեց յատուկ կերպով պատրաստուած յուշանուէր մը:

Պահը հասած էր լսելու շէյխա Ֆարիհայի սրտի խօսքը:

Ան ոգեւորուած օրուան մթնոլորտէն` նախ իր երախտագիտական խօսքերը փոխանցեց բոլոր
ներկաներուն` իրենց ջերմ ընդունելութեան եւ հիւրընկալութեան համար. ապա
հաւաստիացուց, որ հայերուն նկատմամբ միշտ ունեցած է մեծ սէր եւ վստահութիւն եւ
պատրաստ է օժանդակելու համայնքի կարիքներուն: Ան իր խօսքը եզրակացուց`
յայտարարելով. «Ճիգ պիտի չխնայեմ հայ եկեղեցւոյ հողային հարցը լուծելու համար: Կը
խոստանամ, որ կարելիս պիտի ընեմ, մինչեւ որ համայնքը իր եկեղեցական կարիքներուն
համար, տէրը դառնայ հողաշերտի մը:

Անականկալ եւ անսպասելի այս յայտարարութեան իբրեւ արդիւնք, սրահը թնդաց
ծափահարութիւններով: Ներկաները յոտնկայս ողջունեցին շէյխա Ֆարիհային սրտբաց եւ
անմիջական արտայայտութիւնները եւ հիւրը շրջապատելով` անոր հետ ունեցան մտերմիկ
զրոյց:
Հարկ է նշել, որ յաջորդող օրերուն պաշտօնական այս այցելութեան մասին լայնօրէն
անդրադարձան Քուէյթի տեղական մամուլն ու հեռատեսիլը:

---

ՀԱՄԱՅՆՔԻ ԿԵԱՆՔԸ

«ՀԱՅՈՑ ՊԵՏԱԿԱՆՈՒԹԻՒՆ. 5000-ԱՄԵԱՅ ... և 20-ԱՄԵԱՅ» ԽՈՐԱԳՐՈՎ ՀԱՄԱՀԱՅԿԱԿԱՆ ՄԱՆԿԱՊԱՏԱՆԵԿԱՆ ՆԿԱՐՉԱԿԱՆ II ՄՐՑՈՅԹ-ՓԱՌԱՏՕՆԻ ՄՐՑԱՆԱԿԱԿԻՐՆԵՐՈՒ ԱՆՈՒՆՆԵՐԸ

YOUR AD HERE?
00965-94422576

ՔՈՒԷՅԹԱՀԱՅ ԿԵԱՆՔԸ ՆԿԱՐՆԵՐՈՎ

ՀԱՐՑ ՊԱՏԱՍԽԱՆԻ ՄՐՑՈՅԹ ՔՈՒԷՅԹԻ ԱԶԳԱՅԻՆ ՎԱՐԺԱՐԱՆԻ ՄԷՋ

''Որովհետեւ գիտելիք ստանալը միակ միջոցը չէ անհատի զարգացման, հարկ է դիմել տարբեր ու զանազան ձեւերու, եւ հարց-պատասխանի մրցաշարքեր կազմակերպելը ամենալաւ միջոցը կը նկատուի այդ մէկը իրագործելու'':

Քուէյթի Ազգային Վարժարանի տնօրէնութիւնն ու ուսուցչաց կազմը մօտաւոր 200 հարցումներէ բաղկացած թուղթեր պատրաստեց եւ նախապէս բաժնեց մասնակցող աշակերտներուն: Անոնք որոշ ժամանակամիջոցի մը ընթացքին պարտաւոր էին պատասխանել այդ հարցումներուն, ապա սորվիլ: Ընկերային մթնոլորտ մըն էր, աշակերտները շատ անգամ հաւաքուելով միասնաբար կը լծուէին հարցումներուն պատասխանելու աշխատանքին, պրպտումներ կը կատարէին օգտուելով համացանցէն, գիրքերէն եւ նոյնիսկ իրենց ծնողքէն: Երկա՜ր սպասելէ ետք արդէն իսկ մրցաշարքին ժամանակն էր...

Ուրբաթ, 11 Մարտ 2011–ին երեկոյեան ժամը 6–էն սկսեալ Քուէյթի Ազգային Վարժարանի շրջափակէն ներս հաւաքուեցան 6, 7, 8 դասարաններէն 25 մասնակիցներ, իրենց ծնողներուն ու ընկերներուն ներկայութեամբ:  

Քառ լռութիւն կը տիրէր բակէն ներս, երբ Վարժարանիս տնօրէն՝ Պրն. Մանուկ Մանուկեան բարի գալուստի խօսքը յայտնեց ներկաներուն, ապա անոնց ծանօթացուց այդ օրուայ դատական կազմին, որ կը բաղկանար՝Հայերէն լեզուի դասատուներէն՝ Պրն. Ճորճ Արապաթլեան, Օրդ. Դալար Գալըմքարեան, Վարժարանիս փոխ տնօրէն՝ Պրն. Կարօ Արսլանեան, Պատմաբան՝ Պրն. Յովհաննէս Սերոբեան, Տքթ. Ժան Պէպէճեան ինչպէս նաեւ Power Point-ի միջոցաւ օրուայ հարցումներ պատրաստող՝ Օրդ. Մարալ Համպոյեանի եւ օրուայ հանդիսավար՝ Տիկ. Աննա Մանուկեանի:

Եւ արդէն իսկ հարց պատասխանի մրցաշարքը սկսած էր:

Բեմավարը հրաւիրեց 5 աշակերտներ, որոնք նշանակուեցան իբր իրենց խմբակի աւագները, ապա անոնցմէ իւրաքանչիւրը քաշեց խումբի մնացած 4 անդամներուն անունները եւ անոնք նստան իրենց յատկացուած սեղանին շուրջ, որուն վրայ գրուած էր խումբերու անունները՝ Արտաշէս, Արտաւազդ, Հայկ, Տիգրան եւ Արգիշտի:
Պատրաստուած էր 40 հարցում, որոնք կ'երեւէին մեծ պաստառի մը վրայ: Իւրաքանչիւր խումբ պարտաւոր էր պատասխանել 8 տարբեր հարցումի. ամեն մէկուն նիշն էր 10 միաւոր:  

Շա՜տ հաճելի մթնոլորտ մը կը տիրէր բակէն ներս: Յուսախաբութիւն կը տեսնէինք աշակերտներուն դէմքերուն, երբ անոնք չէին լսեր 10 բառը դատական կազմի անդամներէն, սակայն յաջորդ փուլին անոնք ալ աւելի աշխոյժ կը պատասխանէին: Իրենց դէմքի արտայայտութենէն ի յայտ կու գար իրենց ինքնավստահութիւնն ու ուրախութիւնը, երբ անոնք աւելի բարձր արդիւնք կը ստանային:
Եւ արդէն իսկ վերջին փուլն էր. աշակերտները յոգնած բայց միեւնոյն ժամանակ անհամբեր կը սպասէին արդիւնքները:  Հրաժեշտի պահն էր, գումարելէ ետք նիշերը յաղթող խումբը յայտարարուեցաւ...
Ծափահարութիւններու եւ շնորհաւորումներու ձայները արձագանգեցին բակէն ներս, բոլոր մասնակցողները մեծ ուրախութեամբ հաւաքուեցան եւ լայն ժպիտ մը զետեղած անոնց դէմքերուն այդ օրուայ անմոռանալի վայրկեանները յիշատակելի նկարի մը սառեցուցին, Քուէյթի Ազգային Վարժարանի պատմութեան մէջ յաջող էջ մը եւս աւելցուցին:
Ոչ միայն այդ օրուայ շահող խումբը  յաղթական մեկնեցաւ տուն այլ եւ բոլոր մասնակցող աշակերտները:
Վարձքը կատար բոլոր անոնց որոնք մաս կազմեցին այս մրցաշարքի յաջողութեան: նշենք նաեւ, որ յաղթող խումբը արժանացաւ 1000 Ամերիկեան Տոլարի:

---

Ուսումը Բոլորին Համար 
18 միլիոն մարդ արձանագրեց իր անունը պահանջելով, որ ամէն մանուկ յաճախէ դպրոց, որովհետեւ ուսումը ոչ միայն կը յաղթէ աղքատութեան, այլեւ' հիւանդութեան եւ անարդարութեան:
Իւրաքանչիւր փոքր երեխայ արժանի է ստանալու բարձր մակարդակի կրթութիւն, եւ զարհուրելի է, թէ մօտաւորապէս 75 միլիոն փոքր երեխայ բնաւ չի գիտեր ինչ է «Դպրոցի առաջին օր » նախադասութեան իմաստը, բնաւ չէ ունեցած տնային աշխատանք որպէս պարտականութիւն, բնաւ չէ զգացած բարձր նիշ ունենալու զգացումը:
75 միլիոն…մօտաւորապէս չորս անգամն է Քալիֆորնիա նահանգի բնակչութեան:
75 միլիոն…որոնք չեն կրնար գրել իրենց սեփական անունը:
75 միլիոն…որոնք չեն կրնար կարդալ ազդարարութիւնը որ գրուածէ դեղի շիշին վրայ:
Ուսումը կը կասեցնէ աղքատութիւնն ու հիւանդութիւնը, երեւան կը բերէ կայունութիւն, կը յառաջացնէ ուժեղ ազգ եւ երբ ամէն մանուկ երեխայ սկսի դպրոց յաճախել նման կ'ըլլայ այս կէտերը կլորի մէջ դնելու ու կրկնելու նորէն ու նորէն ու նորէն… :
Իմ կրթութիւնս եղած է իմ կողմնացոյցն ու վահանը, իսկ 75 միլիոն փոքր աղջիկ եւ տղայի համար դպրոց երթալու առիթը միայն երազ է, եւ ինչպէ՞ս կրնանք շարունակել արհամարել միլիոններու կամեցողութիւնը:
Մի քանի կարեւոր նպատակներէն մէկն այն է, որ բոլոր մանուկները դպրոց յաճախեն, որպէսի պատրաստենք սերունդ մը, որ կրնայ հասկնալ ու ըմբռնել գիտութեան յառաջադիմութիւնը:
Եւ վերջապէս, կ՛ուզեմ կարդաք այս էջը , բարձր ձայնով խօսիք մանուկներու ուսման մասին, մէկ վայրկեան առէք ձեր օրէն փոխելու համար երեխայի մը կեանքը յաւիենապէս:
                                                                                                 Իզապէլ Սարգիսեան

ԴԷՊԻ ՆԱԽԱՆՁԵԼԻ ԱՍՊԱՐԷԶԻ ՁԳՏՈՒՄ

Ուսուցիչներու օրուան առիթով պատահական չէ, որ «Ազդակ» բաւական լայն կը բանայ իր էջերը` տօնին առիթով արժանին մատուցելու համար հայ ուսուցիչին: Թէեւ տօնը միջազգային է, այսուհանդերձ ինչպէս ամէն տօն հայկական ոսպնեակներէն դիտարկելու խնդիր ունի հայ մամուլը այս պարագային եւ հայ հասարակութիւնը ընդհանրապէս:

Միայն գիտակցումը, որ հայ սերունդներու մօտ ազգային կազմաւորման համար հայ ընտանիքին առընթեր եւ շատ պարագաներու հայ ծնողներէն ալ աւելի ուսուցիչն է, որ կրնայ ճակատագրական դեր խաղալ ապագայ հայ մարդուն կերտման գործընթացին մէջ, տօնն ու նուիրական օրը դուրս կը բերէ յաւուր պատշաճի խօսքեր փոխանցելու պարտականութեան սահմաններէն:

Հայ հասարակութեան ձեւաւորման եղելոյթին վրայ ամէնէն ազդեցիկ գործօնն է հայ ուսուցիչը, որ իր փոխանցած գիտելիքով, շունչով, տագնապներով, խորհրդածութիւններով եւ քննական միտքի զարգացման նպաստող դերակատարութեամբ անշրջանցելի եւ անփոխարինելի իրականութիւն է, որուն հետ հաշուի նստելու պարտաւոր է հայ ազգային կեանքի պատասխանատու խաւը:

Սփիւռքեան հանրակրթական համակարգը, դպրոցավարական խնդիրները, հայ ուսուցիչին դիմագրաւած հարցերը ամէնէն առաջնային հրատապութեամբ օրակարգային կէտերու վերածելու կարիք կը զգացուի շատ սուր կերպով: Կարճ բանաձեւումով` կրթական մարզը ապերախտ ասպարէզէն նախանձելի մասնագիտութեան վերածելու հրամայականն է, որ ինքզինք պարտադիր կը դարձնէ, եթէ անշուշտ կը շարունակենք համոզուած մնալ, որ վաղուան հասարակութեան գիտակցական մակարդակի նուաճումը մեծ բաժիններով կախեալ է հայ ուսուցիչէն:

Իսկ այստեղ հարցերը սերտօրէն փոխկապակցուած են: Նախանձելի ասպարէզի առաջադրանքը կ՛ենթադրէ համապատասխան պայմաններ, արդար վարձատրութիւն, բարոյական գնահատանք, իրաւունքներու յարգում եւ իբրեւ հեղինակութիւններ ճանաչում:

Միաժամանակ սակայն, ակնկալութիւն` նոր որակի, մանկավարժական մեթոտաբանութեան իւրացումի, անվերջ վերաորակաւորումի, մասնագիտութեան տիրապետումի: Ասոնց առընթեր նուիրուածութիւն, բոլորանուէր աշխատունակութիւն, անվերջ ինքնանորոգում` գիտելիքներու եւ միջոցներու:

Տեսութիւններու սահմաններուն մէջ մնալը օգտակար չէ անշուշտ: Այս առաջադրանքները նկատի ունենալն ու ասպարէզին նախանձելիութիւն ապահովելը ի վերջոյ ներկայ իրավիճակի հիմնական փոփոխութիւն կ՛ենթադրէ: Իսկ արմատական բարեփոխումները կ՛ենթադրեն այսօրուան իրողական պատկերի առարկայական իրազեկում, թիւով եւ տուեալներով ուսուցիչներու դիմագրաւած խնդիրներուն հանդէպ լիարժէք տեղեկացուածութիւն եւ դէպի առաջադրուած նպատակներուն հասնելու ուղիներու որոնում:

Ուսումնասիրական եւ կրթական քաղաքականութեան կիրարկման համար մշակելի ռազմավարութեան համար ճիշդ միջավայրի ընտրութիւնը աւելի քան կարեւոր է: Կրթական, տնտեսական, վարչակառավարման, մանկավարժական մասնագիտութիւններու համատեղելիութիւնը  անհրաժեշտ է աշխատանքի արդիւնաւէտութեան համար: Հեռու` շուկայական-առեւտրական մօտեցումներէ եւ գիտակից` հայ ուսուցիչին նախ նորօրեայ ժամանակներուն համապատասխան պատրաստուածութեան ապահովման եւ ապա իրմէ ակնկալելի մանկավարժական մասնագիտութեան գործնականացման  մօտեցումներով այս հարցը յառաջ տանելու հաւաքական պարտաւորութիւնը ինքզինք կը պարտադրէ իբրեւ անյետաձգելի հրամայական:

Ժամանակներն ու պայմանները կը փոխուին: Իւրաքանչիւր ժամանակահատուած իր կանոններն ու օրինաչափութիւնները ունէր եւ ունի: Նախապէս, ուսուցչական ասպարէզը իր ապերախտ բնութագիրով կը յաջողէր սերունդներ կազմաւորել իբրեւ մարդ եւ իբրեւ հայ: Այսօր այդպէս չէ իրականութիւնը: Ուսուցչութիւնը կամ առհասարակ կրթական գործունէութիւնը նախանձելի ասպարէզի վերածելու հրամայական կայ` ժամանակակից պայմաններն ու իրականութիւնները նկատի առնելով:  Զուգահեռ գործընթացներ պէտք են: Որակ, մանկավարժական մասնագիտութիւն, նոր մեթոտաբանութիւն եւ` արդար վարձատրութիւն, բարոյական գնահատանք, իրաւունքներու լիարժէք յարգում:

ԹԻՒ 531, ՈՒՐԲԱԹ, 06 ՄԱՐՏ 2020

Մայիսեան
Տօնախմբութիւն Քուէյթի մէջ

Մայիս 28ին նուիրուած տօնակատարութիւն Քուէյթի մէջ

Մայիս ամիսը հայ ժողովուրդին համար կը նկատուի յաղթանակներու ամիս: Մայիսեան յաղթանակներով է, որ մեր ժողովուրդը կրցաւ կերտել իր հին ու նորօրեայ յաղթական պատմութիւնը՝ Աւարայրը, Հայրենական Մեծ Պատերազն ու Արցախը: Իսկ Մայիս 28-ը՝ Հայաստանի Առաջին Անկախութեան եւ Հանրապետութեան օրը, մեր ժողովուրդի վերապրումի եւ ինքնութեան վերահաստատման խորհրդանիշն է: 
Հայաստանի Հանրապետութեան ծնունդը մեր դարաւոր իղձն էր, որ իրակարնութիւն դարձաւ Սարդարապատի, Բաշ Ապարանի եւ Ղարաքիլիսայի ճակատամարտերուն ընթացքին տարած
փառայեղ յաղթանակներուն շնորհիւ:


95 տարիներ անց, Մայիսեան յաղթանակներու շունչով տոգորուած, միասնութեան բարձր ոգեշնչումով ու հպարտութեամբ, Քուէյթի ՀՅԴ Պատասխանատու Կազմը ձեռնամուխ եղաւ իւրայատուկ տօնախմբութեամբ մը սոյն առիթը նշելու, այդ առթիւ յառաջացնելով Մայիս 28-ի Հանդիսութեան կեդրոնական յանձնախումբը, որ ամիսներու քրտնաջան աշխատանքի շնորհիւ կարողացաւ անմոռաց երեկոյ մը պարգեւել քուէթահայութեան: 
 
Հետեւաբար, Մայիս 16-ին, երեկոյեան ժամը 10:00-ին, Հովանաւորութեամբ՝ Ծոցի Երկիրներու Թեմի
Կաթողիկոսական Փոխանորդ Գերշ. Տէր Շահէ Եպս. Փանոսեանի, տեղի ունեցաւ Հ.Հ. Առաջին
Անկախութեան 95-րդ տարեդարձին նուիրուած շքեղ տօնակատարութիւնը: Հանդիսութեան
նախագահն էր Ասպետ Տիար Կիրակոս Տարագճեան: Քուէյթի Ազգային Մարմիններու կողքին,
սոյն հանդիսութեան ներկայ էին նաեւ ՀՅԴ Բիւրոյի ներկայացուցիչ Ընկ. Դաւիթ Լօքեանն
ու Քուէյթի մէջ Հ.Հ. Արտակարգ եւ Լիազօր Դեսպան Տիար Ֆատէյ Չարչօղլեան: 
Տօնակատարութեան ընթացքին Քուէյթի ՀՅԴ Պատասխանատու Մարմնի խօսքը փոխանցեց Մարմնի ներկայացուցիչ Ընկ. Յակոբ Պետիրեան: Ողջոյնի խօսքով հանդէս եկաւ ՀՀ Արտակարգ եւ Լիազօր Դեսպան Տիար Ֆատէյ Չարչօղլեան, իսկ օրուան խորդուրդը փոխանցեց ՀՅԴ Բիւրոյի անդամ Ընկ. Դաւիթ Լօքեան:  Իսկ հանդիսութեան ճոխ
մթնոլորտն ու բարձր տրամադրութիւնը ապահովեց հայրենիքէն ժամանած սիրուած երգիչ Յովսէփը իր նուագախումբով:

---

ՇԻՏԱԿ ՆՍՏԻՆՔ, ՇԻՏԱԿ ԽՕՍԻՆՔ

ԱԼՕ՞

Պատահած է որ ուզէք ձեր տան հեռախօսը գործածել և
գոնէ կէս ժամ մը սպասել, որ ձեր մինուճար աղջնակը, ձեր սպասողական նայուածքներուն ու համբերահատութեան առջև տեղի տայ, և ընկերուհիին հետ իր շաղակրատանքը
դժկամութեամբ վերջացնէ:
 Չէ՞ պատահած որ ձեր աշխատակիցը, կամ ծանօթ
բարեկամը ձեզի ըսէ, թէ կարևոր լուր մը հաղորդելու համար մէկ ժամ անընդհատ զանգ
  տուած է ձեզի, սակայն հեռախօսը զբաղած եղած է և դուք, ակամայ անյարմար դրութեան
մատնուած էք:
Պատահած չէ՞ որ ձեր հանգիստի մէկ պահուն հեռախօսը
զընգայ ու դուք ընդոստ վեր ցատքելով ընկալուչը առնէք ու միւս կողմէն...երաժշտութիւն
լսէք...:
Երբ այս երևոյթները կրկնուած են, վստահ եմ
մէջերնիդ մեծ փափաք արթնցած է ձեր աղջկան ականջները ոլորելու և ըսելու, որ հեռախօսը
«վիզիթայի» համար չէ, կամ ձեր կնոջ գլխուն հարիւրերորդ դասախօսութիւնը
կարդալով ըսելու, որ ճաշերու և կարկանդակներու չափերը և պատրաստելու եղանակը
հեռախօսով առնել-տալ չընէ: Կամ «փափկանկատօրէն» ձեզի երաժշտութիւն մտիկ ընել
տուողին գխուն զարնելու իր ձայնագրիչ ժապաւէնը: Կամ, կամ,
կամ...: Ափսոս այս հրաշք գործիքը, դարձուցին զզուանքի
առարկայ:
Թերեւս ոչ մէկ գիւտ մարդկութեան այնքան ծառայած է,
որքան հեռախօսը:
Ի՜նչ գործեր դասաւորուած են հեռաձայնային
հաղորդակցութեամբ: Որքա՜ն մարդկային զգացական կապեր հաստատուած են, սրտեր իրարու
բացուած են, խոստովանութիւններ եղած են այդ ափ մը գործիքին  ընդմէջէն:
Հապա տեղեկատուական ցա՞նցը: Ինչպիսի՞ արագութեամբ
լուրեր կը ճամբորդեն  աշխարհի մէկ ծայրէն միւսը...:
Իսկական հրաշք  գործիք:
Սակայն, ինչպէս որ որոշ թեթեւամիտ անչափահասեր ու
հիւանդագին հոգեբանութեան տէր մարդիկ որեւէ ոգտակար բան, վնասակարի վերածելու
հակամէտ են, այդպէս ալ, այս հրաշք գործիքը, այդպիսիներուն ձեռքին մէջ յաճախ
վերածուած է հրեշային գործիքի: Գործիք մը, որ միայն անհանգստութիւն պատճառած է
մարդոց, երբ «ժամանց»ի համար,քով-քովի եկած քանի մը պատանիներ կամ դեռատի աղջիկներ,
պատահա-կան թիւեր հաւաքելով,իրենց զոհերուն գլխուն անհամ խաղեր խաղացած են, բաներ,
որոնք երբեմն շատ լուրջ հետեւանքներ ունեցած են:
Ոչ գիշեր ըսած են, ոչ ցերեկ, ոչ աշխատանքի ժամ, ոչ
հանգիստի, ու մեծ բաւարարութիւն ստանալով իրենց այս ապուշութիւններէն, կուշտ ու
կուռ խնդացած են ու անցած յաջորդ զոհին: Ցաւալին այն է, որ երբեմն այս խաղերուն ականատես ու ականաջալուր եղած են մեծ հայրեր կամ մայրեր, սակայն ոչինչ ըրած են անոնց վերջ տալու համար:
Այս խաղերը տակաւին այնքան վտանգաւոր չեն, որքան
կարգ մը խանգարուած ուղեղներու և ախտաւոր հոգիներու տէր մարդոց հեռախօսազանգերը,
որոնք շրջան մը ընդհանրացած էին, և որոնց ընթացքին կիներու հասցէագրուած
ամենաայլանդակ ու գռեհկագոյն սեռային արտայայտութիւններով, ենթակաները իրենց  չբաւարարուած կիրքերուն գոհացում տալ ուզած են:
Ասոր արդիւնքը այն եղաւ, որ կարգ մը ընտանիքներ
իրենց հեռախօսները լրիւ անջատեցին: Շատեր դիմում կատարեցին թիւերնին փոխելու, ուրիշներ ալ ոստիկանութեան միջամտութեան  դիմեցին:
Եղան նաև կիներ, որոնց մէջ տարիքով մեծեր, որոնք
կլլեցին ըսուածները, շիկնեցան ու լռեցին ու խոշոր բան մը քանդուեցաւ իրենց ներսը, քանի որ դիմացէն հայերէն կը խօսէին...:
Ինչէն ետ մնացեր ենք, որ ասկէ ետ մնանք...:

PUBLISHED IN KUWAIT SINCE 2009
DESIGNED BY GARO ARSLANIAN
PHOTOS BY VAHE BAGHJIAN